francisak_n

Tue, 17 Jun 2008 06:40:26 GMT

***

І вось – праз слоту, боль, бяду

– мне ў сэрцы суцяшэньне ёсьць

Я незваротны, я іду,

на ўсіх гасьцінцах – толькі госьць…

З Рыгора Наракацы

ДН 2008

Fri, 06 Jun 2008 21:51:41 GMT

Субота, у Логвінава, 12-13. Ад"езд на рэчку Іслач. Спазьніўшыеся едуць да Ракава алкуль іх забіраюць ;)

Нечаканыя госьці вітаюцца смс 3784391

ДН 2008

Tue, 03 Jun 2008 16:39:16 GMT

Дзякуй усім за віншаваньні! Хто забыў, можа павіншаваць наўздагон :)

Хвілінка

Fri, 16 May 2008 11:48:24 GMT

Аднойчы Францішак патрапіў па той бок пэўнасьці, у халодную пустату сьвету. Пра гэта ён не асабліва любіў прыгадваць.

Лісты з Паўночнай Затокі

Sun, 04 May 2008 21:52:39 GMT

…..

Тваіх валос цёмныя вадаспады

Патраплялі на вусны, танчылі, спакушалі

Апляталі цела, раўнавалі пяшчотна

Да незнаёмых веяў і да дзёрзкіх мужчынаў

Заміналі нам цалавацца

Sun, 04 May 2008 21:05:08 GMT

…..

Мы цяпер жыхары Восені, запісаў Францішак у дзёньніку.

Усё істотнае сыйшло ў глыбіні. На паверхні засталася пара-тройка штукароў, камедыянтаў, безь якіх нам было б вельмі складана перажыць гэтую Ноч Сьвету.

Яны цёплыя, душэўныя і выкшталцоныя. Яны ўвесь час перад публікай: дастаюць зайцаў і драконаў, запальваюць фэервэркі, расказваюць гісторыі.

Усё гэта дазваляе нам маўчаць у нашых глыбінях.

Хвілінка (фрагмэнты раману)

Sun, 04 May 2008 10:55:32 GMT

…..

Францішак так і ня змог стварыць анічога велічнага. Яму здавалася недаравальнай наіўнасьцю, нават злачынствам, спыняцца і супадаць з формай, у той час як трэба ісьці наперад і сьведчыць.

Куды наперад? І пра што сьведчыць?

Хвілінка (фрагмэнты раману)

Fri, 02 May 2008 20:42:37 GMT

…..

Рыбкі былі жоўтыя, аранжавыя, шэра зялёныя. Яны амаль нерухома трымаліся каля шкла і здаваліся чыёйсьці прыдумкай, двумернай карцінкай, сярод штучных водарасьцяў і галькі, ракавак, каменчыкаў, бурбалак кіслароду, што вырываліся зь нябачных трубак…

Яна была зь сяброўкай, уварвалася ў кавярню як быццам у свой пакойчык і адразу запоўніла сабой прастору, усьмешкай, гэстамі, шалікам, што адразу ўзьнёсься ў паветра як сьцяг і Францішак раптам зразумеў што ўжо недзе бачыў гэтую дзяўчыну, больш за тое, што ён яе ведае, ведае яе рухі, ведае яе пах, яе вусны…

-- Дамініка?!

-- Гэта неверагодная прыемнасьць, -- у цябе закахацца, сказаў Францішак. – Я чакаў гэтага тысячагодзьдзямі. Гэтага лёгкага дрыжаньня рук, жаданьня быць побач, салодкай мэлянхоліі ўвечары й нематываванага шчасьця зранку, адчуваньне палёта, лёгкасьці…

-- Божа, сказаў Францішак, -- дайсьці да паловы, напісаць столькі тэкстаў пра гэта, каб зразумець што ў рэальнасьці гэта здарылася са мной усяго толькі другі раз…

-- Гэта так цудоўна, што ня можа і ня мусіць быць цяжарам, чагосьці патрабаваць, вымагаць, штосьці абяцаць альбо чымсьці валодаць.. Гэта мусіць дарыць Табе чыстую радасьць, -- сказаў Францішак.

-- Два супчыкі, калі ласка, -- сказала яна.

Лісты з Паўночнай Затокі

Thu, 01 May 2008 20:25:27 GMT

Склалася новая кніга.
Вершы.

У гэтую восень.
У Логвінава.

любімае слова :)

Mon, 21 Apr 2008 21:46:20 GMT

кашмар :)

Лісты з Паўночнай Затокі

Sat, 19 Apr 2008 05:12:04 GMT

Углядаючыся ў югэн прамінулага часу

Варушылі вуснамі, спляталі рукі, маўчалі

Пакуль не патрапілі на самы скрай часу

Дзе ўсё, што мелася быць, – адбылося

Сонца сьвяціла, вецер заставаўся ветрам

Быў красавік, – дзёрзкі, злы і халодны

Дрэвы стаялі, як быццам сьнілі кагосьці

І толькі яны, – сыходзілі, адплывалі, зьнікалі

За смугой года, таялі альбо танулі

У прамінулым, – што – так блізка – было

На выспах шчасьця, там, сярод акіяну

Засталіся: яго нататнікі, яе сны, каляндар

Два шалікі, зялёная лямпа, яе завушніцы

Шклянка гарбаты, узьлёт веяў, самота ў Cafe

І боль у сьпіне, крыху вышэй за сэрца

Лісты з Паўночнай Затокі

Thu, 17 Apr 2008 04:36:44 GMT

Лі Бо

П’яны і далёкі, ён блукае па небу

Кідае маланкі, гуляе з аблокамі, запальвае ліхтары

Мудрасьці. Слухае галасы рыб

Сьпявае, танчыць, разьвінвае

Восені косы

П’яны і самотны, чакае сардэчнага сябра

Так, мусіць вярнуцца

Сюды, на неба, ня так проста дайсьці

Сьцежак амаль ня бачна

Прайшло столькі стагодьдзяў

П’яны і сьветлы, ён прыходзіць у сны

Да забытых паэтаў, прамінулага часу

Штосьці абяцае, чамусьці вучыць, – ня бойся

Заплюшчы вочы, ідзі на дно

Гэты боль – асалода

Гэты боль – асалода

Tue, 25 Mar 2008 09:08:15 GMT

Сьнег, Вільня, Сьвята!

Віншую ўсіх!

Хвілінка

Sun, 24 Feb 2008 22:13:50 GMT

…..

Калісьці Францішак распавёў яму дзіўную гісторыю.

Пра штурм крэпасьці, за сьценамі якой невядомыя абаронцы. Штурм доўжыцца многа месяцаў, можа нават гады. Калі тыя, хто штурмавалі, нарэшце ўваходзяць на сьцены, яны з жахам бачаць саміх сябе, -- забітых, раскіданых паўсюль у дзіўных позах, з агідай і зьдзіўленьнем на тварах.

І тут раптам разумеюць, што яны зусім ня тыя, за каго сябе прымалі, кім сябе лічылі. Што сапраўдныя героі – яны – загінулі.

І тады яны даюць загад зьнішчыць усе люстэркі ў Каралеўстве.

Лісты з Паўночнай Затокі

Mon, 04 Feb 2008 23:27:24 GMT

……

Сьмерць – сяброўка, забытая казка

Пакідае мяне назаўсёды

Пакідае мяне на самоце

Несьмяротнасьці – нібы ў пустэчы

Ў незваротнасьці руху паветра

У якім распускаюцца кветкі

Крохкай вечнасьці, п’янай ад болю

апокрыф

Sun, 03 Feb 2008 21:02:47 GMT

…..

Людзі так апантана імкнуцца стаць кімсьці, - прашаптаў Алівэйра. І некаторым гэта нават удаецца.

Таму я так люблю ластавак, - сказала Мага.

Лісты з Паўночнай Затокі

Wed, 30 Jan 2008 21:11:26 GMT

Восень у Парыжы:

Вецер гартае старонкі сноў

Сена цячэ праз пальцы ў нябыт

Такая спакуса

Падыйсьці да самага скраю

Левага берага

Дзе жоўтыя дзьмухаўцы

Вечар

Залатое шчасьце

Абяцаны_Птушке_верш_Лі_Бо

Wed, 09 Jan 2008 06:33:51 GMT

Лі Бо

За келіхам віна самотны сяджу сярод кветак

Анікога навокал, - адзін толькі сьветлы месяц

Таму, узьнімаючы келіх, ветла яго прашу

Вярнуць мне мой цень, - нас тады будзе трое

На жаль ад віна месяц не п’янее

А цені маюць звычку праліваць яго на падлогу…

Я сьпяваю, месяц мне дорыць рэха

Я танчу, - цень поруч са мною

Яны, - пакуль я іх помніў, - былі неблагімі сябрамі!

І толькі калі ўпіўся, - мы разышліся...

Вера ды спадзяваньні, - дзе мейсца ім у гэтым сьвеце?

Сьцежка мая згубілася, самотная, сярод зорак…

Кафэ Акварыюм

Sat, 05 Jan 2008 21:41:24 GMT

З накідаў да апошняй, CXVII Песьні Эзры Паўнда:

…

Я хацеў напісаць Рай

Ня руш

Дай ветру сказаць

Гэта рай

Няхай Богі даруюць тое, што я

зрабіў

І тыя, каго кахаю, паспрабуюць мне

дараваць

Кафэ Акварыюм

Sat, 05 Jan 2008 21:40:24 GMT

.....

Чжуан-Цзы – ня аўтар і нават ня твор у нашым разуменьні. Хаця персанаж Чжуан-Чжоў і прысутнічае ў тэксьце, ён нават не спрабуе граць ролю аўтара альбо настаўніка, пагаджаючыся на амплуа невыпадковага прывіда… Можна было б назваць Чжуан-Цзы кнігай, але для эўрапейскай сьвядомасьці існуе разрыў між Кнігай зь вялікай літары, кнігай сакральнай, -- і проста кнігай. Чжуан-Цзы ані адно, ані другое.

Чжуан-Цзы – гэта канон, збор тэкстаў пэўнага кшталту, аўтарства якіх альбо невядомае, альбо неістотнае. Можна было б сказаць, што сапраўдны аўтар гэтага канону – дыскурс, само даоскае мысьленьне, якое выбрала сабе пэўнае мейсца і пэўны тып трансляцыі. Але ў самім панятку дыскурсу закладзена ідэя пэўнай упарадкаванасьці, пэўных (хаця й няяўных) правілаў, а Чжуан-Цзы бясконца далёкі менавіта ад ўпарадкаванасьці, ад сістэмы, нават ад вучэньня (хаця б і даоскага). Ён вельмі рана атрымаў характарыстыку шалёных прамаўленьняў, звар’яцелых словаў, -- якія пачынаюцца нідзе і сканчаюцца нічым, але пры гэтым здатныя пацэліць проста ў сярэдзіну. Гэтая характарыстыка стала амаль кананічнай, і прывяла да таго, што звар’яцелы канон Чжуан-Цзы стаў чымсьці накшталт “даасізма для паэтаў”, у дапаўненьні (а можа і ў супрацьпастаўленасьці) з Дао-Дэ-Цзын, якая лягла ў аснову эзатэрычных (але пры гэтым сістэматычных, упарадкаваных) практыкаў даоскага самадасканаленьня.

Кафэ Акварыюм

Sat, 05 Jan 2008 21:38:55 GMT

Мае Суразмоўцы на гэты год:

Эзра Паўнд

Марцін Гайдэгер

Чжуан-Цзы

Тыя, да каго хацелася б наблізіцца. :)

Тыя, каго ў гэтым годзе буду чытаць, думаць, разумець.

Новы год

Wed, 02 Jan 2008 09:36:00 GMT

Даражэнькія сябры і сябровачкі!

Усіх віншую ў Новым Годзе!

Дзякуй Вам за віншаваньні, усьмешкі, думкі, пацалункі!

Дзякуй за ўсё мудрае і дзякуй за ўсё звар'яцелае!

"Дзьве Эўрыдыкі"

Sun, 30 Dec 2007 22:35:08 GMT

Магічны тэатар! Толькі для вар'ятаў!

Уваход тут!

О май год :)

Sun, 30 Dec 2007 22:19:19 GMT

…

Мела ўладу загадваць
А апынулася ў палоне

Хацела ляцець удалечыню
А засталася так блізка

Верыла, вагалася, нерухомела
Спляталася ў жарсьці і асалодзе

Мілая госьця, пяшчотная паланяначка
Твая рука, – у маёй

ДН

Thu, 27 Dec 2007 15:06:05 GMT

Цудоўную паэтку Ірыну Дарафейчук - ptushka - віншую з Днём Нараджэньня!